2 Korinthianëve 3

1. A mos nisim përsëri të rekomandojmë veten tonë? Apo kemi nevojë, si disa, për letra rekomandimi për ju, ose për letra rekomandimi prej jush?
2. Ju jeni letra jonë, e shkruar brenda në zemrat tona, që njihet e lexohet nga të gjithë njerëzit.
3. Edhe është e qartë se jeni letër e Krishtit me anë të shërbesës sonë, e shkruar jo me bojë, po me Shpirtin e Perëndisë së gjallë, jo në pllaka guri, po në pllaka zemrash të mishta.
4. Edhe të tillë besim kemi në Perëndinë me anë të Krishtit.
5. Jo se jemi të zotët vetvetiu të mendojmë gjë si prej vetes sonë, por trimëria jonë është nga Perëndia,
6. i cili edhe na bëri të zotët të jemi shërbëtorë të dhiatës së re, jo të shkronjës, por të shpirtit; sepse shkronja vret, kurse shpirti jep jetë.
7. Po në qoftë se shërbesa e vdekjes, që është gdhendur me shkronja në gur, u bë e lavdishme, aq sa të bijtë e Izraelit nuk mundeshin të vështronin me sy fytyrën e Moisiut nga lavdia e fytyrës së tij, që do të prishej,
8. si nuk do të jetë më shumë e lavdishme shërbesa e Shpirtit?
9. Sepse në qoftë se shërbesa e dënimit është lavdi, shumë më tepër tepron në lavdi shërbesa e drejtësisë.
10. Sepse as nuk u lavdërua nga kjo anë ajo që qe e lavdishme, për shkak të lavdisë që kapërcen çdo masë.
11. Sepse, në qoftë se ajo që do të prishej qe e lavdishme, shumë më tepër është e lavdishme ajo që mbetet.
12. Duke pasur pra, të tillë shpresë, flasim me shumë guxim;
13. edhe jo si Moisiu që vinte mbulesë mbi fytyrën e tij, që të mos shikonin me sy të bijtë e Izraelit fundin e asaj që do të prishej.
14. Po mendjet e tyre u verbuan; sepse deri në ditën e sotme po ajo mbulesë në leximin e dhiatës së vjetër mbetet e pazbuluar, se u shfuqizua me anë të Krishtit.
15. Po deri sot, kur lexohet Moisiu, mbulesë gjendet mbi zemrat e tyre.
16. Po kur të kthehet Izraeli tek Zoti, mbulesa do të hiqet.
17. Dhe Zoti është Shpirti; dhe ku është Shpirti i Zotit, atje ka liri.
18. Por ne të gjithë, duke parë me fytyrë të zbuluar, si në pasqyrë, lavdinë e Zotit, ndërrojmë formën në po atë shembëllesë, nga lavdia në lavdi, si prej Shpirtit të Zotit.