Titos 3

1. Kujtoju atyre t’u nënshtrohen autoriteteve e pushteteve, t’u binden atyre, të jenë gati për çdo punë të mirë.
2. Asnjërin të mos shajnë, të mos zihen, të jenë të butë, duke treguar çdo butësi për gjithë njerëzit.
3. Sepse edhe ne ishim njëherë të marrë, të pabindur, të gënjyer, duke u shërbyer dëshirimeve të ndryshme e kënaqësive, duke shkuar jetën në ligësi e në smirë, të mërzitur e duke pasur mëri njëri-tjetrin.
4. Po kur u shfaq mirësia dhe dashuria e Shpëtimtarit tonë Perëndi për njerëzit,
5. jo prej punësh drejtësie që punuam ne, po sipas përdëllimit të tij na shpëtoi, me anë të banjës së rilindjes, dhe me anë të përtëritjes së Shpirtit të Shenjtë,
6. që e derdhi me dorë të hapët mbi ne me anë të Jisu Krishtit, Shpëtimtarit tonë;
7. që, pasi të dalim të drejtë me anë të hirit të tij, të bëhemi trashëgimtarë sipas shpresës së jetës së përjetshme.
8. Për të besuar është fjala; dhe këto dua t’i vërtetosh, që të kujdesen ata që i kanë besuar Perëndisë të jenë të parë për punë të mira. Këto janë të mirat e të dobishmet për njerëzit.
9. Po nga diskutime të marra, e gjenealogji njerëzish, e grindje, dhe luftra ligji largohu, sepse janë të padobishme e të kota.
10. Nga njeriu heretik, si ta mësosh një herë e dy herë, hiq dorë,
11. duke ditur se i tilli është i prishur, dhe mëkaton, sepse e ka dënuar veten.
12. Kur të dërgoj Artemain ose Tihikun tek ti, shpejto të vish tek unë në Nikopol, sepse atje vendosa të dimëroj.
13. Juristin Zina dhe Apolloin përcilli me kujdes, që të mos u mungojë atyre asgjë.
14. Edhe le të mësojnë edhe tanët të jenë të parë për punë të mira për nevojat e domosdoshme, që të mos jenë të pafrytshëm.
15. Të përshëndesin të gjithë ata që janë bashkë me mua. Përshëndeti ata që na duan në besim. Hiri qoftë bashkë me të gjithë ju. Amin.