1 Pjetrit 5

1. U lutem pleqve që janë ndër ju unë plaku, shoku i tyre, dhe dëshmitar i pësimeve të Krishtit, dhe pjesëtar i lavdisë që do të zbulohet:
2. Ruani grigjën e Perëndisë që është ndër ju, duke u kujdesur për atë jo me pahir, po me dëshirë; as për fitim të lig, po me gatishmëri;
3. as si të jeni zotërinj mbi trashëgimin e Perëndisë, po duke u bërë shembull të grigjës.
4. Edhe kur të shfaqet kryebariu, do të merrni kurorën e pafishkur të lavdisë.
5. Gjithashtu edhe ju më të rinjtë, bindjuni pleqve; dhe të gjithë, duke iu bindur njëri-tjetrit, vishni mendjen e përulur; sepse “Perëndia u rri kundër mendjemëdhenjve, po të përulurve u jep hir”.
6. Përuluni pra nën dorën e fortë të Perëndisë, që t’ju lartësojë në kohën e duhur.
7. Edhe gjithë kujdesin tuaj hidheni mbi atë, sepse ai kujdeset për ju.
8. Përmbani veten, rrini zgjuar; sepse ndërgjyqësi juaj, djalli, si luan që ulërin, vjen përqark duke kërkuar cilin të përpijë.
9. Atij kundështoini duke qëndruar të fortë në besim, sepse e dini se po ato pësime u bëhen vëllezërve tuaj në botë.
10. Edhe Perëndia i çdo hiri, që na thirri në lavdinë e tij të përjetshme me anë të Jisu Krishtit, pasi të pësoni pak, ai ju bëftë të përsosur, ju forcoftë, ju dhëntë fuqi, ju themelostë.
11. Atij i qoftë lavdia dhe pushteti në jetë të jetëve. Amin.
12. Me anë të Siluanit, vëllait besnik, ju shkrova juve me pak fjalë, siç më duket, duke u lutur e duke dhënë dëshmi, se ky është hiri i vërtetë i Perëndisë, ky në të cilin qëndroni.
13. Ju përshëndet kisha që është në Babilonë, që është e zgjedhur bashkë me ju, dhe Marku, biri im.
14. Përshëndetni njëri-tjetrin me puthje dashurie. Paqe mbi të gjithë ju që jeni në Jisu Krishtin. Amin.